Ապրիլի 8-ից 14-ն ընկած ժամանակահատվածում ՆԳՆ փրկարար ծառայության հոգեբանական աջակցության բաժինն անցկացրել է «Առաջին հոգեբանական օգնության տրամադրման» և «Զանգերի սպասարկման հոգեբանական առանձնահատկություններ» թեմայով սեմինար-քննարկումներ:
Ներգրավված էին Փրկարար ծառայության ՃԿԱԿ «911» ահազանգման կենտրոնի ծառայողներ և Ոստիկանության ՕԿԿ զանգերի կենտրոնի աշխատակիցներ։
Սեմինար-քննարկումներին առցանց ձևաչափով մասնակցում էին նաև Փրկարար ծառայության մարզային փրկարարական ահազանգման կենտրոնների օպերատորները։
Միջոցառման նպատակն էր՝
– անդրադառնալ զանգերի սպասարկման ընթացքում հանդիպող խնդիրներին,
– ձևավորել հոգեբանական հմտություններ,
– բարձրացնել ահազանգերի սպասարկման արդյունավետությունը։
Փրկարար ծառայության հոգեբանական աջակցության բաժնի մասնագետներն անդրադարձան ահազանգերի սպասարկման ընթացքում հանդիպող խնդիրներին, դերախաղի միջոցով քննարկեցին դրանց առանձնահատկությունները՝ տալով նմանատիպ իրավիճակներին հնարավոր հոգեբանական մոտեցումներ և լուծումներ։
Սպասարկված տարաբնույթ ահազանգերի քննարկումներն ու տեսանյութերի դիտումներն ուղեկցվեցին ահազանգերի սպասարկման ընթացքում թույլ տրվող հնարավոր բացթողումների վերհանումով, ճանաչողական գործընթացների, ճկուն մտածելակերպի և արագաշարժության զարգացումով, որոնք ուղղված էին ահազանգերի սպասարկման արդյունավետության մակարդակի բարձրացմանը։
Հանդիպումների ընթացքում օպերատորները ծանոթացան հոգեբանական աջակցության բաժնի գործառույթներին, օգտվեցին ռելաքսացիոն սարքավորումներից, ինչպես նաև հոգեֆիզիոլոգ-դիագնոստիկ սարքավորման միջոցով անցան հոգեբանական հետազոտություն։
