Ներքին գործերի նախարարությունը հանրային քննարկման է ներկայացրել նախագիծ, ըստ որի՝ Ոստիկանությունում աշխատանքի կարող են անցնել նաև 35 տարին լրացած անձինք։
ՆԳ նախարարի տեղակալ Արմեն Մկրտչյանը ներկայացնում է առաջարկվող փոփոխությունները․
կհանվի Ոստիկանությունում ծառայության անցնելու համար ներկայումս սահմանված վերին տարիքային սահմանափակումը։
Ոստիկանությունում ծառայության կանցնեն 18 տարին լրացած ՀՀ այն քաղաքացիները, որոնք տիրապետում են հայերենին և իրենց անձնական, գործնական հատկանիշներով, կրթությամբ, ֆիզիկական պատրաստականությամբ և առողջական վիճակով կարող են կատարել Ոստիկանության գործառույթները։
Կընդլայնվեն քաղաքացիական անձանց աշխատանքի ընդունվելու հնարավորությունները։ «Գործող օրենսդրությամբ՝ քաղաքացին, երբ ընդունվում է Ոստիկանություն, նա միայն 6 ամիս հետո կարող է դիմել ատեստացիայի։ Մենք այս ժամանակահատվածի սահմանափակումը վերացնում ենք․ համակարգ ընդունվելուց հետո անմիջապես քաղաքացին կկարողանա դիմել ատեստավորման»,-ընդգծում է Արմեն Մկրտչյանը։ Արդյունքում ընդհանուր վարձատրության չափը, օրինակ՝ միջին խմբի պաշտոնում նշանակվելու, «Լեյտենանտ» կոչում ստանալու և գերազանց ատեստավորվելու դեպքում կկազմի շուրջ 500 000 ՀՀ դրամ:
ՆԳ նախարարի տեղակալի խոսքով՝ փոփոխությունների հիմնական նպատակը Ոստիկանությունում ծառայության անցնելու գրավչության բարձրացումն է և կադրալին պատշաճ համալրում ունենալով՝ Ոստիկանության առջև դրված խնդիրների արդյունավետ լուծումը։
