ՆԳՆ ՓԾ տնօրեն-ՆԳ նախարարի տեղակալ, փ/ծ գեներալ-մայոր Կամո Ցուցուլյանը նոյեմբերի 20-ին ընդունել է ԱՄՆ Եվրոպական հրամանատարության Ցամաքային զորքերի ինժեներական կորպուսի Թբիլիսիի տարածաշրջանային գրասենյակի, ԱՄՆ դեսպանատան Պաշտպանական համագործակցության գրասենյակի և «ՍԵՍԿՈ» (Շինինժսերվիս ՍՊԸ) ներկայացուցիչներին։
Հանդիպմանը ներկա էին ՓԾ տնօրենի տեղակալները, Արմավիրի և Վայոց ձորի մարզային փրկարարական վարչությունների պետերը, ՆԳՆ տնտեսական վարչության շինարարական պլանավորման և վերահսկողության բաժնի պետը։
Հանդիպման առանցքում Արմավիրի, Վայոց ձորի և Գեղարքունիքի մարզերում նոր կառուցվելիք հրշեջ-փրկարարական ջոկատների շենքերի նախագծերի և Լոռու մարզի Ստեփանավան քաղաքում կառուցված շենքի շահագործման հանձման աշխատանքային քննարկման հարցերն էին։
Կամո Ցուցուլյանը կարևորել է Հայաստանի Հանրապետության և ԱՄՆ ոլորտային համագործակցությունը՝ նշելով, որ ՆԳՆ փրկարար ծառայությունն իր լիազորությունների շրջանակում շարունակելու է իրականացնել աշխատանքները, որպեսզի հնարավոր լինի սեղմ ժամկետներում ամբողջությամբ շահագործման հանձնել պատրաստի շենքը և արդյունավետորեն կազմակերպել մյուս շինությունների կառուցման աշխատանքները։
ԱՄՆ Եվրոպական հրամանատարության Ցամաքային զորքերի ինժեներական կորպուսի ներկայացուցիչները ՓԾ տնօրենին են ներկայացրել Ստեփանավանի հրշեջ-փրկարարական ջոկատի նորակառույց շենքի մինչ օրս կատարված աշխատանքները՝ նշելով, որ հիմնական շինարարական աշխատանքներն ավարտվել են և շենքն ավարտուն տեսքով Փրկարար ծառայության շահագործմանը կհանձնեն դեկտեմբերի 15-ին։
Անդրադարձ է կատարվել նաև ԱՄՆ ստանդարտներին համապատասխան՝ Բաղրամյանի և Եղեգնաձորի հրշեջ-փրկարարական ջոկատների, ինչպես նաև Սևանի հատուկ ջրափրկարարական ջոկատի նոր շենքերի շինաշխատանքների նախագծային և կազմակերպչական հարցերին։ Նշվել է, որ նախատեսվում է շինարարական աշխատանքներն ավարտին հասցնել 2025 թ. սեպտեմբերին։ Կողմերն անդրադարձել են կառուցապատման մանրամասներին, տեղանքային և տարածքային հարցերին, ինչպես նաև գործընթացում ի հայտ եկած դժվարություններին ու կարիքներին։
Ներկայացված հարցերին համարժեք լուծումներ գտնելու նպատակով պայմանավորվածություն է ձեռք բերվել Փրկարար ծառայության հսկողության ներքո սեղմ ժամկետներում կազմակերպել լրացուցիչ նախապատրաստական աշխատանքներ, որպեսզի կառուցապատումը տեղի ունենա սահմանված ժամկետներում և շենքերը շահագործման հանձնվեն ժամանակին։
ԱՄՆ ներկայացուցիչները պատրաստակամություն են հայտնել վերապատրաստել տվյալ շենքերի պահպանման ու շահագործման համար պատասխանատու անձնակազմին՝ ապահովելու համար արդյունավետ շահագործման և պահպանման մակարդակը։
