Հայաստանում, մասնավորապես՝ Երեւանում, էականորեն շատացել են էլեկտրական շարժիչով անհատական շարժունակության տրանսպորտային միջոցները: Ոլորտը կանոնակարգված չէ, հետեւաբար անհրաժեշտություն է առաջացել օրենսդրությամբ սահմանելու դրանց երթևեկության կանոնները: Այդ մասին ԱԺ պաշտպանության և անվտանգության հարցերի մշտական հանձնաժողովի սեպտեմբերի 6-ի նիստում ասել է ներքին գործերի նախարարի տեղակալ Դավիթ Համբարյանը:
Նիստում առաջին ընթերցմամբ քննարկվել է ««Ճանապարհային երթևեկության անվտանգության ապահովման մասին» օրենքում լրացումներ և փոփոխություն կատարելու մասին» և «Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու մասին» օրենքների նախագծերի փաթեթը:
Ըստ Դավիթ Համբարյանի՝ մանրակրկիտ ուսումնասիրվել են և՛ ոլորտը, և՛ խնդիրը, ինչպես նաև միջազգային փորձը՝ հարցին համապարփակ լուծումներ տալու համար: Սահմանվել են նման փոխադրամիջոցների բնութագրերը և հնարավոր սահմանափակումները:
Օրենսդրական փաթեթն արժանացել է դրական եզրակացության:
